ГАИ қайда қарап отыр?

Сағат 15.00. шамасы болатын. Әл-Фараби және Баймағанбетов көшелерінің қиылысындағы бағдаршам істен шығыпты. Көліктер әрлі-берлі ағылып жатыр. Әйтеуір ретін тауып арғы бетке өттім. Бір қызығы Әл-Фараби даңғылының қозғалыссыз тұйық жағында тұрған МАИ инспекторы өз көлігінің ішінде отырып алып, сырттағы құбылысты «бақылауға» көшіпті. Бұл «көкем» неге көлігінен шығып, көлік қозғалысын реттемейді екен, әлде жол-көлік апатының болғанын күтіп отыр ма деген сауал жылт ете қалды…

15:47. Достық үйіндегі кезекті мерекелік шараға дайындық жұмыстарына қатысып қайта оралып келе жатырмын. Сұмдық-ай! Манағы қиылыста шыныменен жол-көлік оқиғасы орын алыпты. Мемлекеттік нөмірі Р 887 СЕ «Нива» көлігі мен Р 951 NYM нөмірлі шетел маркалы автокөлік қақтығысыпты. Абай болғанда, адам шығыны жоқ екен. Ең қызығы –бағана көлігінен шықпай отырған МАИ инспекторы оқиғаның мән-жайын анықтап жатыр. Кінәлі кім екенін анықтау қиынға түсе қоймас. Себебі бұл жерде инспектордың өзінен басқа бақылау камерасы орнатылған.

Бізді алаңдататыны басқа нәрсе: неге біз қашан болмасын оқиғаның алдын алуға тырыспаймыз? Қашанғы «қолымызды мезгілінен кеш сермеп» жүре бермекпіз? Бұл жолы шен таққан инспектор «ала таяғын» тым кеш сермеген сияқты…